U2 се враќаат со албум за сите фази од животот: „Песни за кујната, автопатот и срцето“

По речиси осум години пауза од оригинален материјал, ирската рок икона U2 се подготвува за големо враќање со нов студиски албум. Во неодамнешно гостување на “Jimmy Kimmel Live!”, фронтменот Боно откри дека бендот работи на албум кој ќе содржи песни за секој аспект од животот.

„Имаме песни за кујната, за автопатот, за гаражата – песни за секој дел од вашиот живот,“ рече Боно, додавајќи дека албумот ќе вклучува „песни за помирување, песни за разделба“. Тој истакна дека бендот се стреми да го долови „звукот на просторијата“, создавајќи музика која ја рефлектира нивната уникатна енергија кога свират заедно.

Боно нагласи дека новиот проект не е само уште еден албум, туку нешто што мора да биде извонредно. „Никој не треба нов U2 албум, освен ако не е извонреден,“ изјави тој. „Сите во бендот се чувствуваат како нивните животи да зависат од тоа. И јас им потсетувам дека навистина е така.“

Овој албум ќе биде прв со нови песни по “Songs of Experience” од 2017 година. Иако насловот и датумот на издавање сè уште не се објавени, фановите со нетрпение очекуваат да слушнат како U2 ќе го дефинираат звукот на иднината.

🎬 Погледнете го интервјуто на Боно со Џими Кимел, каде што зборува за новиот албум: